所謂Cocktail Ring，係泛指一啲設計同用色比較大膽同浮誇嘅戒指，但大家又知唔知佢嘅起源係咩？
最早起源於1920年代嘅美國，當時美國禁酒令生效，但正因為咁，大眾對酒嘅需求反而上升咗，仍然有好多人舉辦地下嘅雞尾酒酒會（Cocktail Parties），而參加酒會上嘅女性好多都會佩戴一啲誇張嘅飾物，呢個就係Cocktail Ring嘅來源。Cocktail Ring唔單止係當時女性用嚟表現個人風格嘅飾物，同時亦係一種當時女性權益開始抬頭嘅象徵（例如女性開始擁有投票權）。
以前提到Cocktail Ring，通常會令人覺得件飾品係手工粗糙，同埋會使用玻璃、水晶等品質較差嘅物料嚟取代寶石，不過依家Cocktail Ring已經擺脫咗呢個負面嘅形象，唔同品牌都會有推出精心設計同製作嘅Cocktail Ring，佩戴一隻就可以作為造型嘅焦點，同時又展現到個人品味。