有啲人戴完耳環除低時，會發現雙耳又痕又腫，甚至會出現紅班。其實，呢個現象係好典型嘅金屬過敏。

絕大部分對金屬過敏嘅人都係對「鎳」過敏。呢種金屬可以話係無處不在：錶帶、皮帶扣等任何合金製品都有可能含有鎳。如果過敏程度特別嚴重嘅人，連含有鎳嘅食物（露筍、大豆類製品、果仁等等）都唔適宜食用。

同好多過敏現象一樣，目前仲未有一個可以確實根治金屬過敏嘅方法。惟一最可靠嘅方法就係儘量避開過敏源。 有金屬過敏嘅人如果想佩戴首飾，最好都係㨂返一啲鍍有鉑金或手術用不銹鋼嘅飾品。