是日以公仔箱（時稱「電視機」）解悶，偶得對白如下：「老世，嗰個阿炳成嚿番薯咁，你做乜請佢？」「佢雖然唔够醒目，之我就係鍾意佢擔屎唔偷食，唔使驚佢穿我櫃桶底。」

廣東話「擔屎唔偷食」形容人老實可靠，個個都知，但若問到呢個俗語點嚟就怕且連做過「倒夜香」嘅人都未必知曉。流傳得最廣嘅幾個解釋多數同「大躍進」嘅「人民公社」黑暗年代有關，無非都係話屎有價值，最啱做肥料，偷人哋啲屎有着數云云。但無論橫解掂解，都唔「覓聲時（makesense）」，就算嗰個人幾老實，甚至笨實，都知道屎又臭又核突，點會偷嚟食？除非佢唔係老實，係腦實，個腦黐到實。

    查實，「擔屎唔偷食」 根本係個誤會，同「屎」字冇關，而同明代嘅大儒，人稱「白沙先生」嘅廣東人陳獻章有關。冇錯，就係「陳白沙駛牛——請趌」入便嗰個主角。白沙先生爲人耿直清高，不滿官場腐敗，辭官後退隱家鄉過住清淡嘅日子，寧願同鄉里借貸，都唔收受朝廷嘅俸給。當時嘅都禦史鄧廷瓚曾經命令地方官員按月送一石米畀佢，但佢堅决唔收，啲鄉里就以「儋石不偷食」稱道佢清廉自守。其中「儋」讀

[耽daam1]，乃裝穀物之容器，「石」讀[daam3]，乃容量單位，「儋石」有「少量」嘅意思。至于「偷食」，並唔係「偷嘢食」，「偷」係「苟且」咁解，例如「偷生」、「偷活」。「儋石唔偷食」意思就係話白沙先生佢老人家唔願意苟且貪吃朝廷嗰尐咁多米糧，呢句話傳到後世依然係形容人正直誠實。但由于口耳相傳，有邊讀邊，深僻嘅「儋」變成個個都識睇嘅「擔」，本應讀[daam3]音嘅「石」就讀成「石頭」嘅「石」音，並逐漸演變成近音嘅「屎」（北方話直頭一樣音添）。于是乎，「儋石不偷食」就成爲「擔屎唔偷食」，雖則唔多合邏輯，但勝在够㜺鬼，留「香」百世。

原文出處